Se queres coñecernos en Vontade, terás que desprazarte a A Rocha, en Tomiño, un entorno rural pero moi preto dos servizos que ofrece o centro do concello. Nel desenvólvese o día a día das persoas usuarias, aténdense consultas de persoas externas e lévanse a cabo as funcións administrativas e directivas precisas para ofrecer unha atención eficaz e personalizada.
O edificio en si, é de planta baixa completamente adaptado con salas para sesións tanto grupais como individuais, comedor, cociña, baños adaptados, sala de reunións e despachos.
A contorna exterior é un espazo de natureza no que se pode atopar, nos diferentes sendeiros, elementos de ocio e rehabilitación. Este está aberto ao público xeral.
A atención diaria no centro arrinca ás 9:30h e remata ás 17:30h para as persoas usuarias do centro de día. Ademais, inclúense no servizo, o transporte dende e ata o seu domicilio en caso de precisalo. É totalmente adaptado e as rutas axéitanse ás necesidades das persoas usuarias e o seu entorno.
Para contactar con nós soamente tes que achegarte ao centro ou poñerte en contacto con nós por teléfono ou correo electrónico. Tras ese primeiro paso, escoitaremos as túas necesidades e expectativas no teu momento vital actual (e as do teu entorno) e falaremos sobre as opcións e servizos, tratando de axeitar o máximo a nosa atención a ti e á túa rede de apoio.
